做皇帝權力、福利多多，係唔少人爭崩頭、不惜一切代價都想做嘅職業，不過一個唔小心就會被人由皇位上拉落嚟，就好似西漢廢帝劉賀咁，只係做咗27日皇帝就被廢黜，認真短命。

廢帝劉賀係漢武帝劉徹嘅孫，5歲就繼承昌邑王位，之後仲被扶上皇位。不過《漢書》話佢「行淫亂」、「持節詔諸官署征發，凡千一百二十七事」，總之就話劉賀在位僅27日就做咗唔少衰嘢，例如行為淫亂、唔受禮法、奔喪搞到去旅行咁，所以被罷黜。皇帝做唔成，劉賀返巨野做昌邑王，之後仲被封為海昏侯。

但幾年前海昏侯墓出土之後，考古學家發現劉賀自細受儒家教育，愛好音樂同捉棋，同史書所記嘅形象出入頗多。於是，越嚟越多嘅史學家質疑，劉賀被廢好可能係因為得罪咗大將軍霍光，或者同霍光嘅利益有衝突，並唔係因為劉賀行為不檢。有史學家就話，劉賀係由皇太后下旨廢黜，而皇太后得嗰十幾歲，仲要係霍光嘅外孫女，所以認為皇太后不過係跟指示做嘢。

原圖為劉賀劇照，取自網絡。